ყველა დიდი თუ პატარა კრიზისული გამოვლინება აჩვენებს, რომ ეს ხელისუფლება ისტორიულ სანაგვეზეა მოსასროლი, - ამის შესახებ პოლიტიკოსმა, რომან გოცირიძემ დასავლეთ საქართველოში დიდთოვლობისგან გამოწვეულ პრობლემებთან დაკავშირებით საუბრისას განაცხადა.
როგორც მან „პალიტრანიუსის“ გადაცემა „რეზიუმეში“ აღნიშნა, ასეთი ხელისუფლების პირობებში „ვერც უამინდობის, ვერც დემოკრატიის, ვერც ეკონომიკის პრობლემა ვერ მოგვარდება“.
„ყველა დიდი თუ პატარა კრიზისული გამოვლინება აჩვენებს, რომ ეს ხელისუფლება ისტორიულ სანაგვეზეა მოსასროლი. ასეთი ხელისუფლების პირობებში ვერანაირ პრობლემას ვერ გადაჭრი, ვერც უამინდობის, ვერც დემოკრატიის, ვერც ეკონომიკის. ამ ერთმა ფაქტმა კიდევ ერთხელ გვაჩვენა რა ხელისუფლებასთან გვაქვს საქმე“, - აღნიშნა გოცირიძემ.
მისივე თქმით, დასავლეთ საქართველოში სტიქიის შედეგებთან გასამკლავებლად საკოორდინაციო შტაბი მას შემდეგ შექმნეს, რაც მოქალაქეებმა თვითინიციატივა გამოიჩინეს.
„ხელისუფლების უნარი ექსტრემალურ სიტუაციებში ვლინდება. ქვეყანაში რამდენჯერაც შეიქმნა პრობლემა, იმდენჯერ განიცადა კატასტროფული მარცხი. ფაქტობრივად, ეს არის იმ ადამიანების გაწირვა, რომლებიც ამ სტიქიების მსხვერპლია.
გამოჩნდა, რომ ხელისუფლება არ არსებობს, საქართველო არ არის ციმბირი, ეს არის ერთი პატარა კუთხე გურია იქნება თუ იმერეთი, სადაც მსგავსი უამინდობების თავიდან აცილებისთვის ხელისუფლება მზად უნდა იყოს მომენტალური რეაგირებისთვის, არაფერმა იმუშავა. შტაბები შექმნეს მას შემდეგ, რაც მოქალაქეებმა თვითინიციატივა გამოიჩინეს. ქუჩის აქციებმა ქვეყანა გაზარდა. ხალხის გადასარჩენად დაირაზმა ხალხი. ამის შემდეგ შექმნეს რაღაც შტაბი. გამოკეტილი სხედან და ყავას სვამენ, შტაბის მუშაობის შედეგი რა არის?“, - განაცხადა გოცირიძემ.
ბოლო საინფორმაციო გამოშვება
