ლიეტუვის პრემიერის განცხადებით, რუსეთის მხრიდან თავდასხმის შემთხვევაში, წინააღმდეგობისთვის მზად არიან, თუმცა ევაკუაციის გეგმებიც მზად აქვთ
ლიეტუვის პრემიერ-მინისტრის, მინდაუგას სინკევიჩიუსის განცხადებით, რუსეთის მხრიდან მომდინარე საფრთხეების ფონზე მისმა ქვეყანამ ევაკუაციის გეგმები შეიმუშავა, თუმცა თავდასხმის შემთხვევაში არ დანებდებიან.
ლიეტუვის პრემიერმა BBC-ის განუცხადა, რომ ლიეტუველები რუსეთის მხრიდან მუდმივ საფრთხეს გრძნობენ, რაც ნაწილობრივ ქვეყნის საჰაერო სივრცეში დრონების შეჭრით არის განპირობებული.
„თავდასხმის შემთხვევაში შევებრძოლებით, ბრძოლაში ჩავერთვებით”, - განაცხადა მინდაუგას სინკევიჩიუსმა.
ამასთან, მან ხაზი გაუსვა, რომ არსებობს გეგმები „სხვადასხვა სცენარისთვის“ და მაგალითად მოიყვანა ხანდაზმული მოქალაქეების ქალაქებიდან შეუფერხებლად გაყვანა და საცობების თავიდან აცილება.
„სხვადასხვა სცენარს განვიხილავთ; ყველა მათგანი საჯაროდ აქტიურად არ განიხილება. კონკრეტული საფრთხეების წინაშე ვდგავართ. არა ყოველდღიურ რეჟიმში, თუმცა ამ საფრთხეებს განვიცდით და ეს ჩვენთვის რეალობაა“, - აღნიშნა ლიეტუვის პრემიერმა.
სინკევიჩიუსმა ასევე აღნიშნა, რომ თავდაცვის საკითხებში მიდგომის კუთხით გაერთიანებულ სამეფოს „აზროვნების შეცვლა“ სჭირდება, თუმცა დასძინა, რომ ლიეტუვა „საზღვართან და საფრთხესთან უფრო ახლოს“ მდებარეობს.
შეგახსენებთ, ნატო-ს გამანადგურებლების პილოტებმა რამდენიმე დღის წინ ლიეტუვის საჰაერო სივრცეში შეჭრილი დრონი ჩამოაგდეს. ლიეტუვის თავდაცვის მინისტრმა, რობერტას კაუნასმა განაცხადა, რომ დრონი ბელარუსის მხრიდან შევიდა.
