CNN - რუსულ ხომალდზე თავდასხმა უკრაინის უსაფრთხოების სამსახურისა და სამხედრო-საზღვაო ძალების ერთობლივი ოპერაციის შედეგად განხორციელდა

CNN - რუსულ ხომალდზე თავდასხმა უკრაინის უსაფრთხოების სამსახურისა და სამხედრო-საზღვაო ძალების ერთობლივი ოპერაციის შედეგად განხორციელდა

ნოვოროსიისკის პორტში რუსეთის სამხედრო-საზღვაო ძალების გემებზე თავდასხმა უკრაინის უსაფრთხოების სამსახურისა და უკრაინის სამხედრო-საზღვაო ძალების ერთობლივი ოპერაციის შედეგად განხორციელდა, - ინფორმაციას CNN სანდო წყაროზე დაყრდნობით ავრცელებს.

წყარომ ტელეკომპანიასთან საუბარში განაცხადა, რომ 450 კილოგრამი ასაფეთქებელი ტროტილით დატვირთული საზღვაო დრონი თავს დაესხა რუსეთის სამხედრო-საზღვაო ძალების ხომალდს, “ოლენეგორსკი გორნიაკს”, რომელშიც დაახლოებით 100 რუსი სამხედრო იმყოფებოდა.

“თავდასხმის შედეგად რუსული გემი სერიოზულად დაზიანდა და დაკისრებული მოვალეობის შესრულებას ვერ ახერხებს “, - განაცხადა წყარომ.

შეგახსენებთ, დღეს დილით რუსეთის თავდაცვის სამინისტრომ გაავრცელა ინფორმაცია, რომ უკრაინის შეიარაღებულმა ძალებმა კრასნოდარის პროვინციაში მდებარე ნოვოროსიისკის სამხედრო-საზღვაო ბაზაზე უეკიპაჟო კატერის გამოყენებით თავდასხმის განხორციელება სცადეს, თუმცა თავდასხმა რუსულმა გემებმა მოიგერიეს.