ოკუპირებული „სამხრეთ ოსეთის“ „ძალოვანები“ მუშაობის გაძლიერებულ რეჟიმზე გადავიდნენ

ოკუპირებულ „სამხრეთ ოსეთში“ ე.წ. ძალოვანი სტრუქტურები მუშაობის გაძლიერებულ რეჟიმზე გადაიყვანეს.ეს გადაწყვეტილება შეხვედრაზე მიიღეს, რომელიც ე.წ. სამხრეთ ოსეთის დე - ფაქტო ლიდერის ალან გაგლოევის ხელმძღვანელობით გაიმართა.

„რელიგიური დღესასწაულების პერიოდში რესპუბლიკის მოქალაქეების უსაფრთხოების უზრუნველსაყოფად, სახელმწიფოს მეთაურის დავალებით, როგორც 8-დან 10 აპრილამდე, ასევე, 14-დან 17 აპრილამდე რესპუბლიკის ძალოვანი სტრუქტურების თანამშრომლები მუშაობის გაძლიერებულ რეჟიმზე გადავიდნენ“, - განაცხადეს დე-ფაქტო უწყების პრესსამსახურში.

„სამხრეთ ოსეთის“ დე-ფაქტო ხელისუფლებამ მოუწოდა მოქალაქეებს, რომლებსაც სურთ მივიდნენ სალოცავებსა და ახლო ნათესავების სასაფლაოზე გამყოფ ხაზთან, „წინასწარ მიმართონ КГБ-ს სასაზღვრო სამსახურს“ და „დაიცვან სასაზღვრო ზონაში ყოფნის წესები“.