ოკუპირებული აფხაზეთის ვეტერანთა ორგანიზაცია ასლან ბჟანიას გადადგომას მოითხოვს

ოკუპირებული აფხაზეთის ვეტერანთა ორგანიზაცია „არუაა“ დე ფაქტო პრეზიდენტ ასლან ბჟანიას ნებაყოფლობით გადადგომისკენ, ე.წ. „პარლამენტს“ კი „საპრეზიდენტო“ არჩევნების დანიშვნისკენ მოუწოდებს, - ამის შესახებ ინფორმაციას ადგილობრივი მედია ავრცელებს.

მათივე ინფორმაციით, ორგანიზაციის თავმჯდომარემ თემურ გულიამ დღეს გამართულ ყრილობაზე ოკუპირებული აფხაზეთის „ხელმძღვანელობა“ გააკრიტიკა. ერთ-ერთი საკითხი, რაზედაც მან ისაუბრა, „ოფიციალურ თბილისთან“ ეკონომიკური ურთიერთობები იყო.

„საქართველოსთან ეკონომიკური ურთიერთობები შეუძლებელია, წინააღმდეგ შემთხვევაში, ამან, შეიძლება აფხაზეთში ოფიციალური თბილისის პოლიტიკის გავრცელება გამოიწვიოს“, - აღნიშნა გულიამ.

მან ასევე გააკრიტიკა საქართველოსთან „მრავალდონიანი მოლაპარაკებების“ იდეა და ხაზი გაუსვა, რომ არსებულ პირობებში „საქართველოსთან ურთიერთობა შეუძლებელია“.

ოკუპირებული აფხაზეთის ვეტერანთა ორგანიზაცია „არუაას“ მე-9 კონგრესზე 700-ზე მეტი ადამიანი შეიკრიბა.