ლაგოდეხის მუნიციპალიტეტის სოფელ ჰერეთისკარში მოსახლეობამ აქცია გამართა

ლაგოდეხის მუნიციპალიტეტის სოფელ ჰერეთისკარში მოსახლეობამ აქცია გამართა. ადგილობრივებმა სასმელი და სარწყავი წყლის დაუყოვნებლივ მიწოდება მოითხოვეს.
მათი თქმით, რამდენიმე თვეა უწყლობით გამოწვეულ გაუსაძლის პირობებში უწევთ ცხოვრება.
„ვითხოვთ წყალს, სასმელსაც და სარწყავსაც. უკვე გაუსაძლისი და აუტანელია ასე ცხოვრება. ვერ ვრწყავთ სათბურებში დარგულ ბოსტნეულს და ხმება. სასმელი წყალი ყოველდღიურად რამდენიმე კილომეტრის მოშორებიდან მოგვაქვს. მერიამაც იცის ჩვენი პრობლემა და ვითხოვთ დაუყოვნებლივ მოაგვარონ“, - აცხადებენ ადგილობრივები.
აღნიშნულ პრობლემას ადგილზე გაეცნო ლაგოდეხის მერი. ჯონდო მდივნიშვილის განმარტებით, წყლის დებეტი შემცირებულია და მოსახლეობის წყლით უზრუნველყოფა ამიტომ ვერ ხერხდება.
მისივე თქმით, ერთ კვირაში წყალმომარაგების კომპანია ჭაბურღილების გასაწმენდად ტენდერს გამოაცხადებს, რამაც შესაძლოა, პრობლემა ნაწილობრივ მოაგვაროს.

























