ფოთის მერიაში ქალაქში გავრცელებულ თევზის სუნთან დაკავშირებული შეხვედრა ხმაურის ფონზე გაიმართა

ფოთის მერიაში ქალაქში გავრცელებულ თევზის სუნთან დაკავშირებული შეხვედრა ხმაურის ფონზე გაიმართა

ფოთის მერიაში ქალაქში გავრცელებულ თევზის სუნთან დაკავშირებული შეხვედრა ხმაურისა და დაპირისპირების ფონზე გაიმართა. დიალოგში ჩართულები იყვნენ სახელმწიფო რწმუნებული სამეგრელო- ზემო სვანეთში ალექსანდრე მოწერელია, გარემოს დაცვისა და სოფლის მეურნეობის მინისტრი ლევან დავითაშვილი, გარემოზე ზედამხედველობისა და სურსათის ეროვნული სააგენტოს წარმომადგენლები, ადგილობრივი ხელისუფლების, საკრებულოს წევრები და რიგითი მოქალაქეები. შეიქმნა სამუშაო ჯგუფი, რომელშიც როგორც ხელისუფლების წარმომადგენლები, ისე საინიციატივო ჯგუფის წევრები და რიგითი მოქალაქეები ჩაერთვნენ.

„რა თქმა უნდა, მოსახლეობის მოთხოვნა არის სამართლიანი. ბატონი ლევან დავითაშვილის და ჩემი ინიციატივით, მანამ, ვიდრე ამ საკითხზე იქნებოდა სამოქალაქო პროტესტი, დაიწყეთ ამ საკითხის შესწავლა. აქტივისტებმა ეს იციან. თუმცა, აღსანიშნავია, რომ ყველა საკითხი უნდა გადაწყდეს სამართლებრივ ჭრილში“, - განაცხადა სამეგრელო-ზემო სვანეთის სახელმწიფო რწმუნებულმა ალექსანდრე მოწერელიამ.

ამ წუთებში სამუშაო ჯგუფის შეხვედრა დახურულ კარს მიღმა მიმდინარეობს. მერიის ადმინისტრაციულ შენობასთან კი საპროტესტო აქცია გრძელდება.