„სამართლიანი არჩევნების“ წარმომადგენლის ინფორმაციით, ზუგდიდში #21-ე და #87-ე საარჩევნო უბნებზე კრიმინალური მენტალიტეტის მქონე პირები გადაადგილდებიან

„სამართლიანი არჩევნების“ წარმომადგენლის ინფორმაციით, ზუგდიდში #21-ე და #87-ე საარჩევნო უბნებზე კრიმინალური მენტალიტეტის მქონე პირები გადაადგილდებიან

არასამთავრობო ორგანიზაცია „სამართლინი არჩევნების“ ინფორმაციით, ზუგდიდში #21-ე და #87-ე საარჩევნო უბნებზე კრიმინალური მენტალიტეტის მქონე პირები გადაადგილდებიან. როგორც ორგანიზაციის ზუგდიდის ოფისის ხელმძღვანელმა დავით ლოგუამ „ინტერპრესნიუსს" განუცხადა, ფაქტის ამსახველი ფოტო/ვიდეო მასალა არ გადაუღიათ, რადგან ეს მათ გაღიზიანებას გამოიწვევდა.

მისივე ინფორმაციით, ადგილზე დაახლოებით შვიდამდე არაუფლებამოსილი პირი გადაადგილდებოდა.

„ადგილზე არ გვყავს წარმომადგენელი, გვყავს მობილური ჯგუფი, რომელიც გარე პერიმეტრს აკვირდება. ამდენად ზუგდიდში გვყავს ასეთი ორი მობილური ჯგუფი. 21 და 87-ე უბნებზე, გვერდიგვერდ არის ეს უბნები. აქ იყვნენ მობილიზებული კრიმინალური მენტალობის დაახლოებით შვიდამდე ადამიანი, რომლებიც ასევე თავისუფლად ახერხებდნენ შესვლას უბანზეც. ფოტოს გადაღებისგან თავი შევიკავეთ, რადგან ეს დამატებით გაღიზიანებას გამოიწვევდა, რადგან ისედაც გაღიზიანებულნი იყვნენ",- განაცხადა დავით ლოგუამ.

აღნიშნულ ინფორმაციას, საუბნო კომისიის თავმჯდომარეები უარყოფენ. #21 საარჩევნო კომისიის თავმჯდომარის სალომე წულაიას თქმით, უბანზე არაუფლებამოსილი პირი არ დაუშვიათ.