შალვა პაპუაშვილი - ჩინეთის მხრიდან არასდროს ყოფილა ისეთი დამოკიდებულება, რასაც ჩვენ ბრიუსელიდან ვხედავთ - ჩინეთსა და საქართველოს შორის ურთიერთობა სანიმუშოა
მიუხედავად გეოგრაფიულ ზომაში, ეკონომიკურ ზომასა და პოლიტიკურ გავლენაში სხვაობებისა, ჩინეთის მხრიდან არასდროს ყოფილა ისეთი დამოკიდებულება, რასაც ჩვენ ბრიუსელიდან ვხედავთ - ჩინეთსა და საქართველოს შორის ურთიერთობა სანიმუშოა, - ამის შესახებ პარლამენტის თავმჯდომარემ, შალვა პაპუაშვილმა პრაღაში, ჟურნალისტებთან განაცხადა.
მისივე თქმით, ჩინეთსა და საქართველოს შორის თანასწორობისა და პარტნიორობის პრინციპებზე დამყარებული ურთიერთობაა, განსხვავებით ბრიუსელისგან, „რომელიც ცდილობს, ქედმაღლურად, ჭკუის სწავლებით და საქართველოსა და ქართველი ხალხის დაკნინებულად წარმოდგენით, სხვადასხვა პოლიტიკური გადაწყვეტილება თავს მოგვახვიოს“.
„ჩინეთის ვიცე-პრეზიდენტის პირველი ვიზიტი საქართველოში არის იმის დასტური, რომ საქართველო წინ მიდის და ძლიერდება. ეს არის სწორედ „ქართული ოცნების“ და ჩვენი ხელისუფლების პოლიტიკის შედეგი, რომ საქართველო იკავებს ძლიერ პოზიციებს როგორც რეგიონში, ისე გლობალურ პარტნიორებთან ურთიერთობაში. ამ მხრივ, ეს არის სწორედ ჩვენი წარმატებული პოლიტიკის დასტური. მეორე მხრივ, ეს აჩვენებს ჩინეთის განსაკუთრებულ პარტნიორულ დამოკიდებულებას სხვა ქვეყნების მიმართ. ჩვენ ვხედავთ, რომ მიუხედავად გეოგრაფიულ ზომაში, ეკონომიკურ ზომასა და პოლიტიკურ გავლენაში სხვაობებისა, ჩინეთის მხრიდან არასდროს ყოფილა ისეთი დამოკიდებულება, რასაც ჩვენ ბრიუსელიდან ვხედავთ. ჩვენ ვხედავთ თანასწორობისა და პარტნიორობის პრინციპებზე დამყარებულ ურთიერთობას, განსხვავებით ბრიუსელისგან, რომელიც ცდილობს, ყოველთვის ქედმაღლურად, ჭკუის სწავლებით და საქართველოსა და ქართველი ხალხის დაკნინებულად წარმოდგენით, თითქოს ვინმეზე ნაკლები ვიყოთ, თავს მოგვახვიოს სხვადასხვა პოლიტიკური გადაწყვეტილება. ჩინეთის შემთხვევაში ჩვენ ვხედავთ პოლიტიკურ თანამშრომლობას. რომელიც განსაკუთრებულად ეფუძნება თანასწორობისა და ურთიერთპატივისცემის პრინციპს,“ - განაცხადა პაპუაშვილმა.
