ვოლოდიმირ ზელენსკი - ორპარტიული მხარდაჭერისთვის მადლობელი ვარ როგორც "დემოკრატების", ასევე "რესპუბლიკელების" - იმედი მაქვს, რომ აშშ-ის შუალედური არჩევნების შემდეგ უკრაინის მხარდაჭერა გაძლიერდება
იმედი მაქვს, რომ აშშ-ის შუალედური არჩევნების შემდეგ უკრაინის მხარდაჭერა გაძლიერდება. ამის შესახებ უკრაინის პრეზიდენტმა, ვოლოდიმირ ზელენსკიმ გერმანულ ტელეარხ ZDF-თან ინტერვიუში განაცხადა.
ზელენსკის თქმით, „დემოკრატები“ ძალიან მკაფიო იყვნენ უკრაინის მხარდაჭერასთან დაკავშირებით და ეს კავშირები ამერიკასა და ევროპას შორის ბოლო ორი წლის განმავლობაში გარკვეულწილად დაიკარგა, ხოლო აღნიშნული ალიანსი ძალიან მნიშვნელოვანია უკრაინისთვის, ვინაიდან მის გარეშე ძალიან რთულია პუტინის გაჩერება.
“რას ნიშნავს აშშ-ის არჩევნების შედეგები ჩვენთვის? - როგორც ადამიანებს, ჩვენ ყოველთვის გვჯერა და ვიმედოვნებთ, რომ ნებისმიერი ცვლილებები უფრო დადებითი იქნება. რატომ? რადგან ნებისმიერი არჩევნების, განსაკუთრებით კი აშშ-ის არჩევნების დროს, სიგნალები გესმის. და სიგნალები "დემოკრატიული პარტიისგან" ისეთები იყო, რომ თუ ისინი მოიგებენ, მაშინ, შიდა საკითხებთან ერთად, მათთვის მნიშვნელოვანი იქნება ევროპაში ომზე ფოკუსირება. ესაა რუსეთის ომი უკრაინის წინააღმდეგ.
ორპარტიული მხარდაჭერა გვაქვს. მადლობელი ვარ როგორც "დემოკრატების", ასევე "რესპუბლიკელების" ამისთვის. მაგრამ არჩევნების დროს "დემოკრატები" ძალიან მკაფიოდ ამბობენ უკრაინის მხარდაჭერაზე, უკრაინისთვის დახმარების მიწოდებაზე. ჩემი აზრით, ეს კავშირები გარკვეულწილად დაიკარგა ამერიკასა და ევროპას შორის ბოლო ორი წლის განმავლობაში. და ეს ალიანსი ძალიან მნიშვნელოვანია ჩვენთვის, ვინაიდან მის გარეშე ძალიან რთულია პუტინის გაჩერება. შესაბამისად, იმედია, რომ ახლა ხელისუფლების ისეთი ბალანსი იქნება, რომ ჩვენ უფრო დაგვიჭერენ მხარს”, - განაცხადა ზელენსკიმ.
