ბათუმის სახელმწიფო უნივერსიტეტში ტრენინგი „მედია და ბავშვთა უფლებები“ ჩატარდა

ბათუმის სახელმწიფო უნივერსიტეტში ტრენინგი „მედია და ბავშვთა უფლებები“ ჩატარდა

ბათუმის შოთა რუსთაველის სახელმწიფო უნივერსიტეტის ბავშვის უფლებათა ცოდნის ცენტრში სტუდენტებისა და ბათუმის სხვადასხვა სკოლის მოსწავლეებისთვის ტრენინგი ჩატარდა თემაზე: „მედია და ბავშვთა უფლებები“.

ბათუმის შოთა რუსთაველის სახელმწიფო უნივერსიტეტის ცნობით, ბავშვის უფლებათა ცოდნის ცენტრში უკვე ჩატარდა 9 ტრენინგი და ვებინარი მოსწავლეებისათვის, მასწავლებლებისა და მშობლებისათვის.

„ღონისძიების მონაწილეებს ბათუმის შოთა რუსთაველის სახელმწიფო უნივერსიტეტის რექტორი მერაბ ხალვაში და საქართველოში გაეროს ბავშვთა ფონდის წარმომადგენელი, ბსუ-ს საპატიო დოქტორი ღასან ხალილი მიესალმნენ და სერტიფიკატებთან ერთად, სამახსოვრო საჩუქრები გადასცეს. ტრენინგს თავისუფალ ჟურნალისტთა სახლის თავმჯდომარე ასლან ჭანიძე და გაზეთ „ბათუმელების“ ჟურნალისტი მანანა ქველიაშვილი უძღვებოდნენ.

ბსუ-ს ბავშვის უფლებათა ცოდნის ცენტრში უკვე ჩატარდა 9 ტრენინგი და ვებინარი მოსწავლეებისათვის, მასწავლებლებისა და მშობლებისათვის. მასწავლებლები გაეცნენ ისეთ აქტუალურ საკითხებს, როგორიცაა: ბავშვთა უფლებების სწავლება სამოქალაქო განათლებაში, მულტიკულტურული განათლების საფუძვლები, რელიგია და ეთნიკური უმცირესობები აჭარის რეგიონში; სპეციალური საგანმანათლებლო საჭიროებების მქონე მოსწავლეების ეფექტური სწავლა-სწავლების სტრატეგიები; განვითარებისა და სწავლის თეორიები საკლასო ოთახში.

მოსწავლეებს ჩაუტარდათ ტრენინგები თემებზე: ,,ბავშვთა უფლებების, შესავალი კურსი დაპროგრამების ენაში“, ,,ემოციების მართვა, პროექტების მართვა“, „თანასწორობა და ბავშვთა უფლებები“, „რა იწვევს ბავშვის ტრამვირებას? როგორ დავიცვათ მოზარდები ტრავმებისაგან“. ასევე მოეწყო ფოტო-ნახატების გამოფენა „ბავშვები იცავენ თავიანთ უფლებებს“.

ბსუ-ში ბავშვის უფლებათა ცენტრი 2021 წელს გაეროს ბავშვთა ფონდის (UNICEF) ორგანიზებით დაფუძნდა. ცენტრი ხელს უწყობს პროფესიონალების, პედაგოგების, აკადემიური პერსონალისა და სამოქალაქო საზოგადოების წარმომადგენლების, მშობლებისა და ბავშვების ინფორმირებას ბავშვთა უფლებების შესახებ”,- აღნიშნულია გავრცელებულ ინფორმაციაში.