“ნიუ ჰოსპიტალსში” თრომბოლიზისი წარმატებით ჩატარდა და ინსულტის შემდეგ პაციენტი სრულად გამოჯანმრთელდა
კლინიკის ინსულტის ცენტრში 28 ივლისს, ფრანგი პაციენტი, ვინჩენცო ფ. იშემიური ინსულტით მოთავსდა. პაციენტს აღენიშნებოდა სიმპტომები - გონების კარგვა, სისუსტე მარცხენა კიდურებში, სახის ასიმეტრია და დარღვეული მეტყველება, რაც მას „ნიუ ჰოსპიტალსში“ მოთავსებამდე 15 წუთით ადრე განუვითარდა.
„ნიუ ჰოსპიტალსის“ ინფორმაციით, სასწრაფო სამედიცინო დახმარების ცენტრის #1117 ბრიგადამ პაციენტი დროულად გადაიყვანა, რამაც „უმნიშვნელოვანესი როლი შეასრულა პაციენტის გამოჯანმრთელების პროცესში“.
„ინსულტის ცენტრში მოთავსებისთანავე, პაციენტს ჩაუტარდა სამედიცინო პროტოკოლით გათვალისწინებული კვლევები და დაენიშნა სისტემური თრომბოლიზისი - ალტეპლაზას გადასხმა. პაციენტის მდგომარეობა გაუმჯობესდა გადასხმის პერიოდშივე - მოიხსნა კიდურების სისუსტე და აღდგა მეტყველება. თრომბოლიზისის პროცედურის დასრულების შემდეგ კი პაციენტი მოთავსდა ნევროლოგიური განყოფილების სტაციონარში, სადაც იმყოფებოდა „ნიუ ჰოსპიტალსის“ ნევროლოგთა გამოცდილი გუნდის დაკვირვების ქვეშ, თემურ მარღანიას ხელმძღვანელობით“, - განმარტეს „ნიუ ჰოსპიტალსში“.
მათივე ინფორმაციით, „ნიუ ჰოსპიტალსიდან“ პაციენტი ნევროლოგიური დეფიციტის გარეშე გაეწერა და თავს კარგად გრძნობს.
„აღსანიშნავია, რომ მაგნიტურ-რეზონანსული ანგიოგრაფიით დადასტურდა სისხლნაკადის აღდგენა მარჯვენა შუა არტერიაში“, - განმარტეს „ნიუ ჰოსპიტალსში“.
სისტემური თრომბოლიზისი, იშემიური ინსულტის მკურნალობის თანამედროვე მეთოდია, რომლის საშუალებითაც შესაძლებელია სისხლძარღვებში არსებული თრომბის დაშლა, სისხლის მიმოქცევის აღდგენა და ტვინის ქსოვილის დაზიანების თავიდან აცილება. თრომბოლიზისი გადაუდებელი სამედიცინო დახმარების პროცედურაა და ინტრავენურ ინექციას - ალტეპლაზას გადასხმას გულისხმობს, რომლის საშუალებით ხდება არტერიებში წარმოქმნილი იშემიური ინსულტის გამომწვევი სისხლის კოლტების დაშლა, მნიშვნელოვანია პროცედურის ადრეულ ეტაპზე - ინსულტის განვითარებიდან უახლოეს საათებში ჩატარება, რათა მოხდეს ინსულტით გამოწვეული ზიანის მაქსიმალური აცილება. „ნიუ ჰოსპიტალსი“ ერთ-ერთი პირველი ჰოსპიტალია, რომელმაც საქართველოში თრომბოლიზისის მეთოდით იშემიური ინსულტის მკურნალობა დანერგა. „ნიუ ჰოსპიტალსის“ ნევროლოგიური განყოფილება დაკომპლექტებულია გამოცდილი ექიმებით და მუდმივად მიმართავს მკურნალობის თანამედროვე მეთოდებს.
(R)
