იუსტიციის საბჭომ უზენაეს სასამართლოში დარჩენილ ვაკანტურ პოზიციებზე ახალი კონკურსი დაიწყო და პარლამენტიც ემზადება ამ პროცესისთვის. ამიტომ ყველა ვთანხმდებით იმაზე, რომ ეს პროცესი უნდა შეჩერდეს, - ამის შესახებ დამოუკიდებელმა დეპუტატმა ეკა ბესელიამ ჟურნალისტებს დიპლომატიურ კორპუსთან შეხვედრის დასრულების შემდეგ განუცხადა.
ბესელიამ დიპლომატებს მოსამართლეთა დანიშვნის თაობაზე ახალი ინიციატივა წარუდგინა და განაცხადა, რომ მათი მხრიდან პრინციპების დონეზე ეს ინიციატივა მისაღებია. ბესელიას თქმით, მოსამართლეთა დანიშვნა უნდა შეჩერდეს იქამდე, სანამ ხელისუფლება არ გაითვალისწინებს ვენეციის კომისიისა და ეუთო/ოდირის რეკომენდაციებს.
„დიპლომატიურ კორპუსს და საელჩოს წარმომადგენლებს გავაცანი ახალი ინიციატივა მოსამართლეთა არჩევის პროცესში ცვლილებების თაობაზე. იცით, რომ იუსტიციის საბჭომ დარჩენილ ვაკანსიებზე ახალი კონკურსი დაიწყო და პარლამენტიც ემზადება ამ პროცესისთვის. ამიტომ ყველა ვთანხმდებით იმაზე, რომ ეს პროცესი უნდა შეჩერდეს. ამერიკის საელჩოს, ევროკავშირისა და ევროპის საბჭოს მომხსენებლების მკაცრ შეფასებებში აბსოლუტურად ღიად არის მითითებული, რომ ახლა მაინც გაითვალისწინოს ხელისუფლებამ ვენეციის კომისიის, ეუთო/ოდირის, ევროკავშირის და ამერიკის საელჩოს რეკომენდაციები. ამ ახალი ინიციატივის პრინციპები დიპლომატიური კორპუსისთვის მისაღებია. ასევე, ვიმუშავებ უმრავლესობის ცალკეულ დეპუტატებთანაც. საერთაშორისო საზოგადოების, სამოქალაქო სექტორის და ყველა ჩვენგანის მხარდაჭერა აუცილებელია იმისთვის, რომ პარლამენტმა ეს ცვლილებები აუცილებლად მიიღოს, იქამდე კი ახალი მოსამართლეების არჩევის პროცესი შეაჩეროს,“ - განაცხადა ეკა ბესელიამ.