არახალია, რომ ბალტიისპირეთის ქვეყნები საქართველოს მიმართ, ყველაზე მტრულ და უსამართლო პოზიციონირებაში არიან მხილებული - მათი ეს გადაწყვეტილებები და პოზიციები ყოველთვის ამაოდ რჩება და ვერანაირ შედეგს ვერ აღწევს, - ამის შესახებ „ქართული ოცნების” დეპუტატმა, რატი იონათამიშვილმა განაცხადა, რითაც ბალტიისპირეთის ქვეყნების მხრიდან დაწესებულ შეზღუდვებს გამოეხმაურა.
მისი თქმით, ლიეტუვა, ლატვია და ესტონეთი ისეთ გადაწყვეტილებებს იღებენ, რომელიც პირველ რიგში, საქართველოს მოსახლეობის წინააღმდეგ არის მიმართული.
„სამწუხაროდ, უკვე არახალია, რომ ბალტიისპირეთის ქვეყნები საქართველოს მიმართ, ყველაზე მტრულ და უსამართლო პოზიციონირებაში არიან მხილებული. მათ არაერთხელ სცადეს, შეელახათ ჩვენი ქვეყნის სუვერენიტეტი. ისინი ისეთ გადაწყვეტილებებს იღებენ, რომელიც პირველ რიგში, ჩვენი ქვეყნის მოსახლეობის წინააღმდეგ არის მიმართული. მათი ეს გადაწყვეტილებები და პოზიციები ყოველთვის ამაოდ რჩება და ვერანაირ შედეგს ვერ აღწევს გარდა იმისა, რომ იმ ადამიანების მიმართ, ვინც გადაწყვეტილებებს იღებენ, მკაფიო დამოკიდებულება უყალიბდება საქართველოს მოსახლეობას. თუ მათ იმის უნარი არ აქვთ, რომ კონკრეტული დასკვნები გამოიტანონ საკუთარი უსაფუძვლო და მტრული გადაწყვეტილებებისგან, შეუძლიათ ასე გააგრძელონ. საბოლოო ჯამში, მათ ხელში შერჩებათ ფარატინა ფურცლები, მაგრამ როგორც ჩანს, ისინი უკეთეს ქაღალდებს არ იმსახურებენ”, - აღნიშნა იონათამიშვილმა.
ცნობისთვის, ესტონეთის საგარეო საქმეთა მინისტრის, მარგუს ცაჰკნას განცხადებაში აღნიშნულია, რომ ესტონეთი საქართველოს 55 მოქალაქეს, მათ შორის პროკურორებს, მოსამართლეებს, პოლიციელებს, დეპუტატებსა და სხვა პირებს ქვეყანაში შესვლას უკრძალავს. ესტონეთის საგარეო საქმეთა სამინისტროს ინფორმაციით, ესტონეთში შესვლა, საერთო ჯამში, საქართველოს 83 მოქალაქეს აქვს აკრძალული.
ამასთან, ლიეტუვის საგარეო საქმეთა მინისტრი, კიასტუსის ბუდრისის ცნობით, “ლიეტუვამ 74 ქართველი ჩინოვნიკი, საქართველოში ადამიანის უფლებების მძიმე დარღვევისა და რეპრესიების გამო, იმ ადამიანების სიაში დაამატა, რომლებსაც ქვეყანაში შესვლა ეკრძალებათ.”
გარდა ამისა, ლატვიის საგარეო საქმეთა მინისტრი, ბაიბა ბრაჟე X-ზე წერს, რომ ლატვიამ საქართველოს 16 მოქალაქეს ქვეყანაში შესვლა შეუზღუდავი ვადით აუკრძალა.
„ლატვიის პერსონა ნონ გრატთა სიას საქართველოს 16 მოქალაქე დავამატე, შეუზღუდავი ვადით აეკრძალა ლატვიაში შემოსვლა. გადაწყვეტილება მიღებულ იქნა იმიგრაციის კანონის 61-ე მუხლის მე-2 ნაწილის შესაბამისად შესაბამისად“, - წერს ბრაჟე.
ბოლო საინფორმაციო გამოშვება
