საინფორმაციო სააგენტო ინტერპრესნიუსი

საქართველოს დაცვაზე ლაპარაკობენ, მაგრამ ჯარი გაანადგურეს, სახელმწიფო საზღვრები დაცული არ არის - პრემიერ-მინისტრი საოკუპაციო ხაზთან ნამყოფი არ არის , - ამის შესახებ „ლელოს“ერთ-ერთმა ლიდერმა, გრიგოლ გეგელიამ „პალიტრანიუსის“ გადაცემა „პოლიტიკურ სივრცეში“ განაცხადა.

როგორც “ქართული ოცნების“ ინიციატივაზე, რომელიც საზოგადოებას „ფსევდოლიბერალური იდეოლოგიისგან და მისი გარდაუვალი მავნე შედეგებისგან დაიცავს“, საუბრისას განაცხადა, ეს თემა „ყურით მოთრეული და გამოგონილია“.

მისივე თქმით, „ლელოს“ პარლამენტში საქართველოს დაცვის აქტი აქვს შეტანილი, რომელიც რეალურ საფრთხეს აზღვევს.

„რა თქმა უნდა, ლგბტ პროპაგანდის თემა ყურით მოთრეული და გამოგონილია. საქართველოს დაცვაზე ლაპარაკობენ, მაგრამ ჯარი გაანადგურეს, სახელმწიფო საზღვრები დაცული არ არის. ირაკლი კობახიძე, ახლა უკვე პრემიერ-მინისტრი, 44 წლის ისე გახდა, რომ საოკუპაციო ხაზთან ნამყოფი არ არის. საკუთარი შვილი ერთ-ერთ ყველაზე ლგბტ-მეგობრულ უნივერსიტეტში გაუშვა ამერიკაში და ჩვენ გვეუბნება, რომ თურმე ამერიკაში ტრანსგენდერი მასწავლებლები ასწავლიან.

„ლელოს“ პოზიცია არის ის, რომ ეს კანონი, რომელიც არც კი დაწერილა, ვენეციის კომისიაში გადააგზავნონ. განიხილოს კომისიამ, ვნახოთ დასკვნა და ლაპარაკი შემდეგ გავაგრძელოთ.

თუ „ქართულ ოცნებას“ საზოგადოების დაცვა სურს, ჩვენ „ლელოს“ პარლამენტში საქართველოს დაცვის აქტი გვაქვს შეტანილი, რომელიც რუსეთიდან მომავალ საფრთხეს რეალურად აზღვევს. ის რეალურ ნაბიჯებს შეიცავს, რეალური ქართველების დასაცავად, ეკონომიკურად, პოლიტიკურად და უსაფრთხოების თვალსაზრისით“, - განაცხადა გრიგოლ გეგელიამ გადაცემაში.