მედიაციის ჯგუფის ბრიუსელიდან საქართველოში გამოგზავნას სრულებით მხარს ვუჭერ, ასეთი ჯგუფის გამოგზავნისთვის ბოლო კვირებში დაუღალავად ვმუშაობდი. მიხარია, რომ ბატონი მიშელის მიერ ამ მხრივ გაწეული ძალისხმევა მოწონებული იქნა, - განუცხადა ევრონესტის ვიცე-თავმჯდომარემ და საქართველო-ევროკავშირის საპარლამენტო ასოცირების კომიტეტის წევრმა, ევროპარლამენტარმა მარკეტა გრეგოროვამ „ინტერპრესნიუსს“.
გრეგოროვას თქმით, ევროკავშირის მხრიდან საქართველოში პოლიტიკური კრიზისის მედიაცია ორგანიზაციის მხრიდან დახმარების ხელის გაწვდის სიგნალია.
„ვიმედოვნებ, რომ როგორც პოლიტიკური პარტიებისთვის, ასევე მოქალაქეებისთვის ეს საკმარისი სიგნალია იმის დემონსტრაციისთვის, რომ ევროკავშირი ზრუნავს საქართველოზე და მისთვის დახმარების ხელის გაწვდენა სურს“, - განაცხადა გრეგოროვამ.
ამას გარდა, შესაძლო ვადამდელ არჩევნებზე საუბრისას, ევროპარლამენტარი ამბობს, რომ მსგავს გამოსავალს სიტუაციის მოგვარება შეუძლია, თუმცა მხარეების პოზიციების გათვალისწინებით, ამ მხრივ აღნიშნულ საკითხზე პლებისციტის გამართვა უფრო შესაძლებელი იქნებოდა.
„რაც შეეხება ვადამდელ არჩევნებს, თუ ამას კონფლიქტის ორივე მხარე დათანხმდება, ვფიქრობ, ეს სიტუაციას ცალსახად მოაგვარებდა, თუმცა მხოლოდ იმ შემთხვევაში, თუ ეჭვები არ დარჩება, რომ პროცესმა სამართლიანად ჩაიარა, სხვა შემთხვევაში იგივე უწესრიგობას მივიღებთ, რომელშიც ახლა ვართ, მხოლოდ უარესს. ამის მიუხედავად, ვისმენ რა ორივე მხარის პოზიციებს, ვფიქრობ, რომ ისინი ვადამდელ არჩევნებზე ვერ შეთანხმდებიან. ვვარაუდობ, რომ პლებისციტი უფრო შესაძლებელი და ნაკლებად რთული გამოსავალი იქნებოდა“, - განაცხადა ჩეხმა ევროპარლამენტარმა.
ბოლო საინფორმაციო გამოშვება
