დეპუტატ ეკა ბესელიას ინფორმაციით, საარჩევნო სისტემის ცვლილებაზე ოპოზიციის მიერ შემუშავებულ კანონპროექტზე ეუთო/ოდირის დასკვნა მალე დაიდება. ამასთან, როგორც ბესელიამ აღნიშნა, ოპოზიციასა და ხელისუფლებას შორის ხვალინდელ შეხვედრასთან დაკავშირებით, მას პოზიტიური მოლოდინი არ აქვს.

„გულწრფელად გითხრათ, არ მაქვს პოზიტიური მოლოდინის საფუძველი და ცოტა სკეპტიკურად ვუყურებ ამ შეხვედრას. იმ ვითარებაში, როდესაც „ქართულ ოცნებას“ უკან დახევა არ სურს და ახლა მაჟორიტარული არჩევნების პირობებში ამ მრავალმანდატიან ოლქებთან დაკავშირებით ტრიალებს, არ მგონია, რომ ამას გასცდეს მათი შემოთავაზება. ვფიქრობ, ჩვენ მიერ ინიცირებულ კანონპროექტზე დასკვნა მალე იქნება და ამ დასკვნის შემდეგ, დღის წესრიგი ბევრად უფრო ცხადი და მკაფიო იქნება. პირველადი ინფორმაციით, ეს დასკვნა მალე უნდა იყოს,“ - განაცხადა ბესელიამ.